#उत्तराखण्ड मातृभाषा अभियान मा आखर#*21 फरवरी खुणी अंतरराष्ट्रीय मातृभाषा दिवस परैं आखर समिति द्वारा आयोजित होलु कार्यक्रम*

श्रीनगर गढ़वाल - #उत्तराखण्ड मातृभाषा अभियान  मा आखर#

*21 फरवरी खुणी  अंतरराष्ट्रीय मातृभाषा दिवस परैं आखर समिति द्वारा उर्ये जालो कार्यक्रम*

       श्रीनगर का  शगुन रेस्टोरेंट मा  गढ़वाळि भाषा- साहित्य तैं समर्पित  "आखर " कि बैठक  ह्वे , जै मा आखर द्वारा चलाए जाण वळा "उत्तराखंड मातृभाषा अभियान " परैं चर्चा  ह्वे।  ये अभियानै  संकल्पना युवा गढ़वाळि साहित्यकार अर  ' आखर ' का सक्रिय सदस्य सूरत (गुजरात ) मा रौण वळा  गीतेश नेगी कि छ जै मा उत्तराखंड का  सब्बि  रैबासी - प्रवास्यों अर संस्थाओं से ये अभियान मा शामिल होंणै धै- धाद  लगाये जाणि छ। मातृभाषा परैं सामाजिक चिन्तन अर गम्भीरता से वूं का संरक्षण संवर्धन अर अपणा  दैनिक जीवन मा वूं को व्यवहारिक प्रयोग परैं जोर दीणै कोसिस करे जाणि च।

         'आखर ' दगड़ि समाज की हौरि बि प्रबुद्ध संस्था ,बुद्विजीवियों अर साहित्यकारों भौत बढ़िया वैचारिक सहयोग ईं दिशा मा मिलणू  छ अर भौत सारी  संस्था 21 फरवरी,  अंतरराष्ट्रीय मातृभाषा दिवस  परैं  कार्यक्रम आयोजित कन्नै तैयारी कन्नी छन। 

         ईं  बैठक मा य बात  तै ह्वे  कि  21फरवरी  खुणी आखर समिति  'अंतर्राष्ट्रीय मातृभाषा दिवस ' परैं कार्यक्रम आयोजित कारलि।  बैठक मा ईं बात परैं बि  भाैत नाराजगी व्यक्त कर्ये गे कि -  अब्बि तक उत्तराखंड का गौरव , गढ़वाळि गीत -संगीत का युगपुरुष अर कालजयी रचनाकार श्रद्धेय" श्री नरेंद्र सिंह नेगी जी " तैं  क्वी "पद्म "सम्मान किलै नि दिए गे। 

          आखर कि ईं  बैठक मा  पिछला मैना दिवंगत होंण वळा   वरिष्ठ  गढ़वाळि कथाकार श्री बृजेन्द्र कुमार नेगी जी तैं बि श्रद्धांजलि अर्पित कर्ये ग्ये।  बैठक मा श्री मुकेश काला, श्री प्रभाकर बाबुलकर, श्री राकेश जिर्रवाण,  संदीप रावत ,  श्रीमती अनीता काला , श्रीमती बवीता थपलियाल मैठाणी,  श्रीमती आरती पुंडीर, श्रीमती रेखा चमोली छा। 

                                                संदीप रावत

                                         अध्यक्ष - आखर समिति 

                                             श्रीनगर गढ़वाल ।