04 दिसंबर 2021 : मेरा वास्ता एक समळौण्या दिन।🙏 🙏सैंतीस बर्ष बाद परम पूज्य प्रिंसिपल साब जी का दर्शन 🙏🙏
04 दिसंबर 2021 कु दिन मेरा वास्ता एक खास दिन बणी गे। 03 दिसंबर ब्याखुनि दौं फोन ऐ कि - 'पछयाण जरा कि मि कु ब्वन्नू छौं?' मिन बोलि- 'मि आवाज़ त पछयाणु छैं छौं, पण...'
तब उनै बटि आवाज ऐ - 'संजी, दिनेश, बन्टू अर तू दगड़ी त पढ़दा छा, खेलदा छा। अरे! मि संजी पिताजि ब्वन्नू छौं।'
प्रिंसिपल साब ब्वन्ना छा हैंकि तरफां बटि। जी हाँ, हमारा प्रिंसपल साब। 🙏मेरा पिताजि का, मेरा अर वेदीखाल इंटर कॉलेज का प्रिंसपल साब। एक कुशल अर आदर्श अधिकारी, जो बाद मा शिक्षा विभागा एक बड़ा अधिकारी यानि 'ए. डी. बेसिक बनारस (उ. प्र.)'बटि रिटैर ह्वेनि।
वूंन फिर बोलि- 'ब्यट्टा! मि ईं तरफां अयूं छौं काम से। तेरा पिताजि का दर्शन कन्न चांदु अर त्वे थैं बि मिलण चांदु। भोळ सुबेर आठ बजि तक श्रीनगर ऐ जौंलु तुमारा घर परैं।'
यो सुणीक मि तैं जो खुसी ह्वे, वु यख मा व्यक्त कन्न मुश्किल छ। मि तैं बि भारी रौंस लगिगे वूं से मिलणा कि- कब सुबेर होलि,अर कब मि प्रिंसपल साब जी का दर्शन करलु । मिन जब पिताजि तैं य बात बतै त पिताजि बि भौत खुश ह्वेनि, किलैकि जब पिताजि टीचर बणीनि इंटर कॉलेज वेदीखाल त प्रिंसपल साब जीन ही पिताजि तैं ज्वाइनिंग दे छै। जब मि दर्जा 7-8 मा पढ़दु छौ त वे टैम परैं बि वु वखि छा। भौत सारि बात याद ऐ गे छै बाळपन कि। दिनेश (देवेश )अर बन्टू का पिताजि बि वेदीखाल इंटर कॉलेज मा पिताजि दगड़ा टीचर छायि। प्रिंसपल साब ' जीन भौत नौ कमै अर वु शिक्षा विभागा एक भौत सक्रिय अधिकारी छा।
ठिक आठ बजि परम पूजनीय 'प्रिंसपल साब ' श्रीनगर पौंछि गे छा अर हमारा घर परैं आठ बजिक दस मिन्ट परैं। वूं दगड़ा वूं का रिस्तेदार बि छा। मिन ठीक सैंतीस साल बाद वूं देखि। मिन वूंका खुट्टयों मा मुंड नवायि। वु मेरा अर पिताजि का गौळा भिंट्येनि। लगभग सवा घंटा हमारा यख रैनि। पण, इथगा कम टैम मा बि इथगा अपण्यास दिखे अर छवीं- बत्थ ह्वे गैनि कि, यख मा बिंगौण मुश्किल छ। हमारु घौर अर मि बि धन्य ह्वे गे छौ आज। प्रिंसिपल साब जी कु आशीष मिलि। बाळपन बटि मि भौत संकोची स्वभौ कु छौ,पण प्रिंसिपल साब जीन बोलि कि - ' ब्यट्टा आज मि त्वे देखिक भौत खुश छौं। बस! इन्नी बणी रैयि अर होंदु -खांदु (उन्नति ) रैयि।' बड़ो आशीर्वाद मिलि अर ब्याळी मि तैं ये आशीर्वादा रूप मा एक हौरि 'उज्याळे मुट्ठ ' सि बि दिख्ये।
जी हाँ। प्रिंसपल साब जी कु नौ छ -- "श्री पान सिंह बिष्ट " अर उमर छ - पिच्चासि साल (85वर्ष )। पण, ईं उमर मा बि फिट-फोर छन। अज्यूँ बि वी चमक अर
चळक-मळक(रौनक )। मेरा पिताजि अर प्रिंसिपल साब जी दगड़ा का अब तीन -चार गुरुजी ही ईं दुन्या मा छन। मेरा पिताजि बि अबारि बय्यासी साल (82बर्ष )का छन।
परम श्रद्धेय श्री पान सिंह जीन सन्1967 मा उनतीस सालै उमर मा एक साल वेदीखाल इंटर कॉलेज मा प्रिंसिपल का रूप मा ऑफिसिएट करि अर सन् 1968 मा प्रिंसिपल बणि गैनि । लगभग बाईस साल (22 वर्ष ) वेदीखाल इंटर कॉलेज मा सेवा कन्ना बाद बी.एस.ए.(BSA) टिहरी, ऐटा अर सहारनपुर डी. आई.ओ. एस. (DIOS ) रैनी अर वां का बाद द्वी साल बनारस मा रैकि सन् 1996 मा 'ए.डी.बेसिक 'का पद बटि रिटैर ह्वेनि।
नमन परम पूज्य गुरुजी अर प्रिंसिपल साब जी तैं।🙏🙏
संदीप रावत
न्यू डांग -ऐठाणा, श्रीनगर गढ़वाल।
Shandar, yadgar mulakat rai....
ReplyDeleteधन्यवाद 🙏v
Deleteभैजि मन गदगद ह्वे, इना समलौण्या दिन कभि-कभार अन्दि..... गुरूजी थेई श्रद्धापूर्वक प्रणाम्! ..... मिथे भि सन् 2017 मा राजकीय स्नातक महाविद्यालय
ReplyDeleteमा हिन्दी विभाग मा नियुक्ति मीलि..... त गुरू जीकू नौउ सूणि......
ReplyDelete