कीर्तनगर : 23 दिसंबर 2021
'भौत खुशी दगड़ा मनायि स्व. इंद्रमणि बडोनी जी कि जयन्ती '
23 दिसंबर 2021 खुणि 'अटल उत्कृष्ट राजकीय इंटर कालेज कीर्तिनगर( टिहरी गढ़वाल )' अर मेरा स्कूल रा.इ.कॉ.धद्दी घंडियाल, बढ़ियारगढ़ (टिहरी गढ़वाल ) मा स्व. इंद्रमणि बडोनी जी कि जयन्ती लोक संस्कृति दिवस का रूप मा शानदार कार्यक्रमों दगड़ा बड़ी खुसी से मनाये गे। ये दौरान बच्चों मा बि भौत उत्साह दिख्ये।
' अटल उत्कृष्ट राजकीय इंटर कालेज कीर्तिनगर ' द्वारा आयोजित कार्यक्रम मा मि बि न्यूत्यूं छौ। कार्यक्रमौ संचालन प्रखर वक्ता, मंच संचालनौ सळ्ळी, शिक्षक अर मेरा दगड़्या श्री कमलेश जोशी जीन करि। कार्यक्रम मा मिन, गढ़ कवि श्री देवेंद्र उनियाल जी अर श्रीमती साईनी नौटियाल उनियाल जीन बि अपणि -अपणि रचना बांचिन। ईं स्कूला पूर्व छात्र भुला प्रभु दयालन जागर अर गीतों सुन्दर प्रस्तुति दे। अ. उ. रा. इ. कॉ. कीर्तिनगर कि बालिकौंन मांगळ अर हौरि गीतों कि भौत सुन्दर प्रस्तुति दे। हम लोगुंन बच्चों तैं गढ़वाळि भाषा अर ईं भाषै सक्या (ताकत ) अर शब्द -सामर्थ्य बच्चों तैं बतौणै कोशिश करी।
यो कार्यक्रम मुख्य अथिति माननीय खंड शिक्षा अधिकारी (कीर्तिनगर ) डॉक्टर एस०एस०नेगी जी, विद्यालय का सब्बि सम्मानित शिक्षकगणों कि उपस्थिति मा सम्पन्न ह्वे।
ये कार्यक्रमौ उद्देश्य उत्तराखंडा गाँधी स्व.इंद्रमणि बडोनी जी का व्यक्तित्व, वूं का जीवन, लोक संस्कृत्या संरक्षण अर उत्तराखंड आंदोलन मा वूं कि ज्वा महत्वपूर्ण भूमिका छै वे तैं स्कूल्या नौना -नौन्यूं तैं बिंगौणा दगड़ा -दगड़ी यखै लोक संस्कृति,गढ़वाळि भाषै सक्या, शब्द -सामर्थ्य अर साहित्या बारा मि बतौण छौ।
मि तैं न्यूतणौ वास्ता 'अटल उत्कृष्ट राजकीय इंटर कालेज कीर्तिनगर का आदरणीय प्रधानाचार्य महोदय जी, श्री कमलेश जोशी जी,श्री संदीप मैठाणी जी अर खंड शिक्षा अधिकारी महोदय जी को हार्दिक धन्यवाद। ईं स्कूला बच्चों सामणि अपणि प्रस्तुति देण अर वूं दगड़ा संवाद कन्न मा मि तैं भौतै अच्छाे लगि।
ये सम्मानौ वास्ता अटल उत्कृष्ट राजकीय इंटर कालेज कीर्तिनगर( टिहरी गढ़वाल ) परिवारौ दिलै गैरै से हार्दिक धन्यवाद।
हैंकि तरफां हमारा स्कूल रा.इ.कॉ.धद्दी घंडियाल, बढ़ियारगढ़ मा बि ये अवसर परैं बच्चोंन लोकगीतों परैं भौत सुन्दर प्रस्तुति दे। बच्चोंन अर शिक्षकोंन बि गढ़वाळि मा अपणि प्रस्तुति दे।
संदीप रावत(प्रवक्ता रसायन )
रा.इ.कॉ.धद्दी घंडियाल, बढ़ियारगढ़
(टिहरी गढ़वाल )
