संदीप रावत की गढ़वाली कविताएं - उलटन्त,जुगराज रयां,सब्र को बीज ,कब आली बारी, बचपन

                     * संदीप रावत  *
        ( शिक्षक , गढ़वाली लेखक)
जन्म- 30 जून 1972
जन्म स्थान - ग्राम : अलखेतू(कसाणी),पोस्ट- बगड़ी(वाया-पोखड़ा), पट्टी-तलाईं ,जिला -पौड़ी गढ़वाल
वर्तमान पता-   न्यू डांग, श्रीनगर गढ़वाल  (उत्तराखंड )
सम्प्रति - प्रवक्ता(रसायन), रा.इ.कॉ.धद्दी घण्डियाल बडियारगढ़ (टि. ग.)
पिता का नाम - श्री महावीर सिंह रावत |
माता का नाम - स्व0 कमला रावत |
प्रकाशन -  चार गढ़वाली पुस्तकें प्रकाशित
(1) एक लपाग ( गढ़वाली कविता-गीत संग्रह)
(2) गढ़वाळि भाषा अर साहित्य कि विकास जात्रा (गढ़वाली भाषा साहित्य का ऐतिहासिक क्रम )
(3) लोक का बाना (गढ़वाली आलेख संग्रह )
(4) उदरोळ ( गढ़वाली कथा संग्रह )

©संदीप रावत की कविताएं -
   
  (1)   कविता : 
            
         *उलटन्त *

गंडेळों का सिंग पैना ह्वेगैनी,
जूंको का हडगा कटगड़ा ह्वेगैनी
किताळों कि बैकबून मजबूत ह्वेग्ये,
अर! मच्छरौं का टँगड़ा सीधा ह्वेगैनी |

किरम्वळा अब तड़ाक नि देंदा, डंक मन्ना
सरैल मा जहर कि मिसाइल छ्वडणा
उप्पनोंन बि तड़काणु छोड़ियाळि
तौं पर अब डी डी टी अर निआन असर नि कन्ना  |

संगुळा अर झौड़ा बज्रबाण बण्यां
न्योळा अर गुरौ अब दगड्या बण्या
बिरौळा कि बरात मा मूसा ब्रेकडांस कन्ना
अर! चौंर्या स्याळ बाघ ना, शेर बण्या  |

भौंरा -मिरासि फूलों मा जहर छ्वळणा
बल उल्लू दिन मा द्यखणा
हंस, काणा अर गरुड्या चाल हिटणा 
घूण, अन्न $ बदला, मनखि तैं घुळणा  |

हूंदा खांदा गौं मा घेंदुड़ा पधान बण्या
जूंका अब ल्वे ना, इमान चुसणा 
बिरौळा अब खौं बाघ बणी गैनी
अर!  कुकरौं कि दौड़ मा, भ्वट्या शेर बण्या  |

   (2) कविता :
          
        *जुगराज रयां *

जुगराज रयां वू मनखी
जु अपणु फजितु कैकि अब्बि बि
गौं मा मुण्ड कोचिक बैठ्यां छन
अपणा पित्र कूड़ा
अर थर्प्यां द्यबतौं मा द्यू -धुपणो कन्ना छन |

जुगराज रयां वू
औजी, धामी -जागरी
जु अब्बि बि नौबत, धुंयाल बजौणा छन
घर -गौं तैं ज्यूंदो रखणा छन |

जुगराज रयां वू
मां- बैणी
जु  अज्यूं बि कखि दूर गौं मा
थड्या, चौंफळा खेलणा छन |

जुगराज रयां वू सब्बि
जु अपणि ब्वे तैं नि छ्वड़णा छन
जु जांदरौं तैं द्यखणा छन
तब बि अपणा गौं मा छन |

(3)  कविता :  
                * कब आली बारी *
      
      कुकुर लग्यां छन पत्यला चटण पर
       बिरौळा मिस्यां छन थाळी
       गूणी -बांदर स्याळ टपरौणा
       कब आली हमारी बारी ,
       गुरौ बैठ्यां छन यखा खज्यना पर
       संग्ति कुण्डळी मारी
       भ्रष्ट सुंगरौंन चबट्ट कैर्याली
       ईमान कि सैरी सारी |

(4) कविता :  
                   *सब्र को बीज *
             एक बीज सब्र को
             हमारा भितर होण चैंद ,
              हव्वा कैs बि दिशा हो
              धीरज नी खोण चैंद |
                         अर ! खाद -पाणी मीनत की
                               सदानि दिदा होण चैंद ,
                               अफुं पर विश्वास कैर
                                 जै - कै मा नी रोण चैंद |
                                एक बीज सब्र को
                                 हमारा भितर होण चैंद |
(5 ) कविता :
                 * बचपन *
          टीवी ,मोबाइल ,
           कम्प्यूटर अर
           किताब्यूं का नीस
            दबणू च बचपन ,
            दूध- घ्यू अर दैS का बदला
            चाउमीन  चौकलेट
            छकणू  छ बचपन |
                            कमरों का भितर
                             आज ग्वड्यूं छ
                             फस्सोरिक स्ये नि
                             सकणू छ बचपन ,
                             खेली नि सकणू
                              हैंसी नि सकणू
                             झसकेणू अर छळेणू छ बचपन |
      © संदीप रावत ,न्यू डांग ,श्रीनगर गढ़वाल
                गढ़वाली लेखक/ कवि, गीतकार
                  मो0- 9720752367