© संदीप रावत, श्रीनगर गढ़वाल
इन्नी , देहरादून मा रौण वळी, भगवान गोपीनाथ जी कि धरती ' गोपेश्वर ' मा पढ़ीं - लिख्यीं अर एक कुशल गृहणी श्रीमती संगीता तिवाड़ी लखेड़ा जी मा बि गजब कु हुनर छ, गजब कि कला छ। जब वूंन मि तैं मेरु ऐन -सैन 'पेंसिल स्कैच' भेजि त मन खिलपत ह्वे ग्ये।
सै बात त य बि छ कि - वो पेंटिंग बि गजबै बणाैंदन। वूं का माँ सरस्वती जी, भगवान बद्रीविशाल जी , राधा - कृष्ण जी, माँ लक्ष्मी जी, भोलेनाथ जी, श्री राम जी आदि कि भौतै बढ़िया पेंटिंग बणाई छन अर महापुरुषाें, कलाकारों का उम्दा पेंसिल स्कैच बणायां छन ।
यां का अलावा वूं कि अपणि कलम -कूंचि दार्शनिक पक्षों पर बि चलाईं छ। जन कि - वूं कि 'आँखि ' पर बणाईं पेंटिंग द्यखण लैक छ। ब्वलदन बल - 'वु आँखि आँखि नि छन जो सच तैं नि देखि सक्दि, सच्चै दर्शन नि करोंदिंन।' हमारा सुख- दुख, खुशी सब्या कुछ बतै दिंदन आँखि।
वूं कि य पेंटिंग भौत कुछ बिंगाणी छ ।
"सुनो प्यारी नैना
हमेशा खुश ही रहना।
दबना न किसी गलत से,
हमेशा सच को सच ही कहना। "
स्कूल टैम बटि वूं तैं चित्रकारी अर पेंटिंग कु शौक छाै, पर वै टैम परैं प्रचार - प्रसार नि करी छौ अर ना ही वु अपणी ईं कला तैं भैर लै सकनि। वूं कि य कला काॅपी का भितर ही रै गे छै अर फिर दबीं ही रैगे।
बड़ी बात त य बि छ कि लॉक डाउन मा अब वूंन अपणा ये हुनर तैं हौरि निखारि अर फैलास देणा छन।
मेरी ईं स्कैच का वास्ता, मि तैं य 'समूण' देणा वास्ता आपाै भौत -भौत आभार अर धन्यवाद आदरणीय श्रीमती संगीता तिवाड़ी लखेड़ा जी। माँ सरस्वती कि कृपा आप परैं सदानि बणी रौवु अर आपका ये हुनर तैं, ईं कला तैं हौरि फैलास (विस्तार) मिलाे, ईं शुभकामना का दगड़ा ---
संदीप रावत
न्यू डांग, श्रीनगर गढ़वाल।
भौत सुन्दर
ReplyDeleteमाँ सरस्वती सदा साथ रहे, और तरक्की दे संगीता जी को