"मूर्धन्य लोक साहित्यकार डॉ. गोविन्द चातक जी कि जयन्ती परैं वूं तै " आखर " समिति द्वारा श्रद्धांजलि अर्पित "
मूर्धन्य लोक साहित्यकार डॉ. गोविन्द चातक जी कि जयन्ती परैं 19 दिसम्बर 2020 खुणी " आखर " समिति का सदस्यों द्वारा स्थानीय डालमिया धर्मशाला (बद्री -केदार धर्मशाला ), श्रीनगर गढ़वाल मा सूक्ष्म कार्यक्रम आयोजित कैरिक वूं तै श्रद्धांजलि दिये गे ।
ये सूक्ष्म कार्यक्रमै सुर्वात डॉ. चातक जी का चित्र परैं माल्यार्पण अर फूल पाति चढ़ैकि ह्वे। बैठक मा वक्ताओंन लोक साहित्य अर गढ़वाळि साहित्य मा "डॉ. चातक " जीक महत्वपूर्ण योगदान पर चर्चा करी । "आखर "समिति का अध्यक्ष संदीप रावतन बोलि कि - "कोरोना (कोविड -19) वजौ से आज 19 दिसंबर 2020 खुणी डॉ. गोविन्द चातक जी की जयन्ती परै "आखर "समिति द्वारा श्रद्धांजलि स्वरूप ही यो सूक्ष्म कार्यक्रम होणु छ। "डॉ. गोविन्द चातक स्मृति व्याख्यान माला अर सम्मान समारोह " आयोजित कन्नू संभव नी ह्वे सकी । डॉ. गोविन्द चातक जी जन विभूतियों तैं याद कर्ये जाण भौत जरूरी छ ,जौंन लोक साहित्य अर गढ़वाळि साहित्य मा अपणो अमूल्य योगदान दे ।
मुकेश काला जीन बोली कि - " स्थिति सामान्य होंण परै "आखर" द्वारा आयोजित समारोह /कार्यक्रम मा या जो बि उचित होलु ये सालौ आखर सम्मान यानि "डॉ.गोविन्द चातक स्मृति आखर साहित्य सम्मान- वर्ष, 2020 " श्री ललित केशवान जी तैं दिये जालु। आखर समिति कि तरफां बटी सम्मानित होण वळा वरिष्ठ साहित्यकार श्री ललित केशवान जी तैं वूंन हार्दिक बधै दे। मुकेश काला जीन यो बि बोली कि - आखर समिति अपणा हिसाबन नई सोच का दगड़ा काम कन्नी च। वूंन आखर का उपस्थित सदस्यों आभार बि व्यक्त करी।
डॉ. गोविन्द चातक जी कि जयन्ती परैं ये सूक्ष्म समारोह मा वूं तैं फूल पाति अर्पित कन्न वळों मा "आखर " समिति का श्री मुकेश काला जी, श्री सौरभ बिष्ट जी, श्री संदीप रावत, मयंक पंवार जी, श्रीमती अंजना घिल्डीयाल जी, श्रीमती अनीता काला जी , श्रीमती बविता थपलियाल मैठाणी जी,. श्रीमती रेखा चमोली जी छा। श्रीमती बवीता थपलियाल मैठाणी जीन ये अवसर परैं लोकगीत बि सुणायि। संचालन संदीप रावतन करी।
No comments:
Post a Comment