भौत दुःखद --
* नि रैनि उत्तराखण्ड कि इक महान विभूति अर गढ़वाळि कथा साहित्य का कालजयी रचनाकार श्रद्धेय श्री मोहन लाल नेगी जी*
(जलम - 23 जनवरी 1930 , बेलग्राम, पट्टी- अठूर, टिहरी गढ़वाल , भग्यान - 26 अक्टूबर 2020 ,देहरादून)
गढ़वाळ्या जण्या- मण्या वरिष्ठतम कथाकार अर लेखक , टिहरी का वरिष्ठतम विद्वान अधिवक्ता श्री मोहन लाल नेगी जी देहरादून मा भग्यान ह्वे ग्येनि । श्री मोहन लाल नेगी जी को दिवंगत होण गढ़वाळि भाषा-साहित्या वास्ता इन क्षति छ जै कि भरपै कब्बि नि कर्ये जै सकेंद । अचणचक तबियत खराब होणा वजौ से 26 अक्टूबर 2020 खुणी वूं को देहरादून मा स्वर्गवास ह्वे ग्ये । मि तैं बि य सूचना देहरादून का वरिष्ठ साहित्यकार श्री शूरवीर रावत जीन द्ये ।
दस गढ़वाळि कथौं पैलो बड़ो ऐतिहासिक गढ़वाळि कथा संग्रै - "जोनि पर छापु किलै(1967)" , वां का बाद फिर गढ़वाळि कथा संग्रै "बुरांस की पीड़(1987)", गढ़वाळि उपन्यास- सुनैना(2012) द्येकि वूंन गढ़वाळि भाषा-साहित्य मा अपणो अमूल्य अर ऐतिहासिक योगदान द्ये । गढ़वाळि साहित्य मा स्व. मोहनलाल नेगी जी का ये योगदान तैं कबि बि अर कै बि तरौं से नि बिसर्ये जै सकेंद । यो गढ़वाली भाषा-साहित्यै अनमोल धरोहर छन । वूं को अपणि मातृभाषा गढ़वाळि भाषै प्रति भौत पिरेम छौ । नब्बे- इक्कानब्बे सालै उमर मा बि श्रद्धेय श्री मोहन लाल नेगी जी एक तपस्वी कि तरौं साहित्य साधना कन्ना रैनि ।
दस गढ़वाळि कथौं वूंन अंग्रेजी मा अनुवाद बि करी । वूं को " मध्य हिमालय की कहानियाँ "सन् 2000 मा प्रकाशित ह्वे । पिछला साल ही नब्बे सालै उमर मा वूंकि 408 पेजों किताब " यादों की गलियाँ " प्रकाशित ह्वे छै । वूं को " रामायण को गढ़वाळि गद्य अनुवाद" अब्बि अप्रकाशित छ । यां का दगड़ा-दगड़ि वु "हिंदी- गढ़वाली -अंग्रेजी "कि डिक्शनरी बि तैयार कर कन्ना छायि । गढ़वाळि कवितौं परैं बि वूंन कलम चलै छै।
सरल - सौम्य सुभौ वळा श्रद्धेय श्री मोहन लाल नेगी जी को आशीर्वाद हमुतैं अर "आखर " तैं सदानि मिली ।
गढ़वाळि भाषा-साहित्य तैं समर्पित "आखर" समिति(श्रीनगर गढ़वाल) का वास्ता य गौरव वळि बात छै कि "आखर "समितिन् डॉ.गोविन्द चातक जी कि जयन्ती परैं (19 दिसम्बर 2019)देहरादून का हिन्दी भवन मा अपणा वीर्येयां कार्यक्रम मा गढ़वाळि साहित्य मा अमूल्य योगदान द्येणा वास्ता श्री मोहन लाल नेगी जी तैं स्व. बचन सिंह नेगी जी दगड़ा *डॉ.गोविन्द चातक स्मृति आखर साहित्य सम्मान- 2019* से सम्मानित करी । इन विभूति तैं सम्मानित कैरिक क्वी बि संस्था या समिति अफुतैं गौरवान्वित मैसूस कर्द अर इलैई एक तरौं से "आखर" समिति बि इन विभूति तैं सम्मानित कैरिक अपणा आप सम्मानित ह्वे छै। ये ही कार्यक्रम मा वूं कि 408 पेजों किताब " यादों की गलियाँ " को लोकार्पण बि ह्वे छौ |
स्व. मोहन लाल नेगी जी तैं यो सम्मान मिल्नी -
(1) सन् 1985 मा " जय श्री सम्मान " से सम्मानित ।
(2) सन् 2000 मा केदारखण्ड सांस्कृतिक सम्मान
(3) सन् 2007 मा हिंदी साहित्यिक सम्मान मेरठ,
(4) सन् 2010 मा श्रीदेव सुमन सांस्कृतिक सम्मान।
(5) सन् 2017 मा चिठ्ठी - पत्री सम्मान ।
(6) सन् 2019 मा "डॉ.गोविन्द चातक स्मृति आखर साहित्य सम्मान -2019 "(आखर समिति,श्रीनगर गढ़वाल) ।
"आखर " समिति स्व. मोहन लाल नेगी जी का भग्यान( दिवंगत )होण परैं वूं तैं सादर श्रद्धांजलि द्येंद अर ईं घड़ी मा वूं का शोक -संतप्त परिवारा प्रति संवेदना व्यक्त कर्द।
महान साहित्य साधक स्व. मोहन लाल नेगी जी तैं शत-शत नमन अर विनम्र श्रद्धांजलि ।
© संदीप रावत
अध्यक्ष - आखर समिति
(न्यू डांग,श्रीनगर गढ़वाल )
Monday, October 26, 2020
नि रैनि उत्तराखण्ड कि इक महान विभूति अर गढ़वाळि कथा साहित्य का कालजयी रचनाकार श्रद्धेय श्री मोहन लाल नेगी जी*
Saturday, July 18, 2020
कविता - प्लास्टिक का फूल रे !©संदीप रावत ,श्रीनगर गढ़वाल
प्लास्टिक का फूल रे !
****************
भलो दिख्येंदि भैर-भैर
रंगीलो , हाइ-फाइ , दन ,
पण! कख रंगै सकदि तू
कैकु बि मन ?
कब दे सकदि हव्वा तैं
जरा-सी बि गन्ध ?
प्लास्टिक का फूल रे !
तेरी कानि सदानि काणी
ना तेरी जैड़, ना क्वी धरती,
ना खाद-पाणी !
18/07/2020 © संदीप रावत ,
न्यू डांग, श्रीनगर गढ़वाल
Sunday, July 12, 2020
रचना - इना सूण © संदीप रावत,न्यू डांग ,श्रीनगर गढ़वाल
इना सूण
इना सूण ,इना सूण , मेरा दिदा इना सूण
कख बोकणी छैयि सुद्दि अति गाण्यूं कि दूण ।
मनख्यात बिन मनखीन् चिफळि गिच्चि को क्या कन्न
मैनों बटि नह्ये- धुये ना हो बल सूट- बूट को क्या कन्न
भली नि लग्दि साग- भुज्जि- दाल- रैठो बिना लूण ।
अफुतैं भलि क्वे देख पैलि कर्मोन् अपणो भाग लेख
ईं दुनिया मा अफूं ही चलण सबसे पैलि अक्वेंक
ना छिरकौ तू सुद्दि -सुद्दि ,वचन-प्रवचनों कि स्यूण ।
नखरी छ्वीं-बत्थूंम किलै अच्छ्याणा धरीं तेरि मूण
मनै मैली चदरी हटौ ,भलि छ्वींयूं कि कम्बळि बूण
तू द्यवता ना बस मनखी छै ,ईं बात तैं भलि क्वे गूण ।
काल का गाल सब समायि जान्द एक दिन
करम रैयि जान्द बस अग्वाड़ि आन्द एक दिन
बहम -अहम छोड़ दे तू ,बिस्वासै चदरी भलि क्वे बूण ।
© संदीप रावत , न्यू डांग, श्रीनगर गढ़वाल
Friday, June 5, 2020
रचना - भली छ्वीं-बत्थ ©संदीप रावत ,न्यू डांग ,श्रीनगर गढ़वाल
"भलि छ्वीं -बत्थ "
पौड़ बटि ही निकल्द दगड्या, मिठ्ठू- मिठ्ठू पाणी रे
बिन अफूं म्वर्यां स्वर्ग नि मिल्दू ,कैर ना सुद्दि कि स्याणी रे ।
मीनत का करड़ा हथ्यूंन तू , जीवन की कूड़ी-बाड़ी बणै
सगोर का छप्यला भला ढुंग्योंन ,अपणी तू ब्यौहारी बणै
धर्ती मा औण सुफल ह्वे जावु गूणी ले इन क्वी गाणी रे ।
भली छ्वीं-बत्थ -कर्मों का रँगोंन, जीवन कि तिबारी सजै
क्वाँसो- सुकेला मन-मंदिर मा ,ईमान कि फूल-पाती चढ़ै जिकुड़ि कि तौली मा भ्वरि ले दगड्या प्यार-पिरेमौ पाणी रे ।
सुकेला विचारों का मोळ-माटन लीपि मनऽ चुलखाँदी रे
सुद्दि खत्येणि नि द्येयि दगड्या जीवन कि पणदारी रे
द्यखण-भलण सब दुनिया मा ,पण काणी छ्वीं नि लाणी रे ।
© संदीप रावत ,न्यू डांग ,श्रीनगर गढ़वाल ।
Friday, May 8, 2020
रचना - लोग © संदीप रावत ,श्रीनगर गढ़वाल
" लोग "
झूटी- सच्ची बुज्याड़ि जिकुड़ी धरदन लोग
मुखड़ी देखी सामणि टुकड़ी डलदन लोग ।
हुणत्यळि डाळी का मौळंदा पात देखीक
झट्ट जलड़ौंम छांछ संग्ती डलदन लोग ।
दूधौ-दूध , पाण्यो- पाणि द्यिख्येंद सब्यूं
पिछनै बाघ सामणि बिराळि बणदन लोग ।
सब्बि जगौं क्वी बण्यां रौंदन भौत पर्वाण
हैंका तैकम झट्ट पक्वड़ी तलदन लोग ।
जणदा नी बल मंत्र द्येखा बिच्छी को
सर्प द्वलणी हत्थ फिर्बी कुचदन लोग।
मिल्द जब हे स्याळ ददा वळो पट्टा "संदीप "
अफ्वी औतारी अफ्वी पुजारी बणदन लोग।
© संदीप रावत ,न्यू डांग ,श्रीनगर गढ़वाल
Wednesday, April 1, 2020
इक महान विभूति छायि श्रीरामचरित मानस जना महाकाव्य को गढ़वाळि अनुवाद कन्न वळा अर 17 किताब्यूं का रचयिता वरिष्ठ साहित्यकार बचन सिंह नेगी जी ©संदीप रावत
*उत्तराखण्ड कि इक महान विभूति अर गढ़वाळि भाषा -साहित्य मा अनुवाद विधा का पुरोधा छायि श्रद्धेय बचन सिंह नेगी जी*
(जलम 04 नवम्बर 1932 - भग्यान 21मार्च 2020 )
हिन्दी अर गढ़वाळि का सुप्रसिद्ध वरिष्ठ साहित्यकार , धार्मिक ग्रन्थों कु गढ़वाळि मा अनुवाद कन्न वळा जण्या -मण्या अनुवादकर्ता श्री बचन सिंह नेगी का दिवंगत होण गढ़वाळि भाषा-साहित्य का वास्ता इन क्षति छ जै कि भरपै कब्बि नि कर्ये जै सकेंद | तबियत भौत खराब होणा वजौ से 12 मार्च 2020 बटि स्व.बचन सिंह नेगी जी देहरादून इक अस्पताल (वेड मेड अस्पताल ) मा ICU मा छायि अर वखि 21 मार्च 2020 खुणी राति लगभग 9.35 परैं वूं को स्वर्गवास ह्वे ग्ये छौे | 22 मार्च खुणी लॉक डाउन की वजौ से 23 मार्च खुणी वूं कि अंत्येष्टि हरिद्वार मा ह्वे | पिछला चार साल बटि वूं कि तबियत खराब छै | य सूचना वूं का सुपुत्र डॉ. विनोद सिंह नेगी जीन् संदीप रावत ( अध्यक्ष -आखर समिति) तैं द्ये छै | सोशल मीडिया का माध्यम से श्रीनगर बटि संदीप रावत द्वारा य सूचना हौरि लोगूं अर साहित्यकारों तैं द्यिये ग्ये |
एक तपस्वी कि तरौं श्रद्धेय श्री बचन सिंह नेगी जी चुपचाप सदानि अपणि साहित्य साधना कन्ना रैनि | वूंन पाँच बड़ा-बड़ा धार्मिक ग्रन्थों को गढ़वाळि मा अनुवाद करी अर अपणा संसाधनों से प्रकाशित कैरिक गढ़वाळि भाषा-साहित्य मा अपणो अमूल्य अर ऐतिहासिक योगदान द्ये | गढ़वाळि अनुवाद साहित्य मा स्व.बचन सिंह नेगी जी का योगदान तैं कबि बि अर कै बि तरौं से नि बिसर्ये जै सकेंद | गढ़वाळि कवितौं परैं बि वूंन कलम चलै |
वूं को अपणि मातृभाषा गढ़वाळि भाषा का प्रति भौत ही ज्यादा पिरेम वूं द्वारा लिख्यीं यों पंक्तियों से सिद्ध होंद---
"वेद पुराण उपनिषद रामैण ,बिटि सारलीक तुलसीन मथे
अपणा अन्तर तैं सुख देणक ,अवधी मा मानस ग्रन्थ रचे |
वे ग्रंथ कि भाव मैं क्या समझू ,या नन्हि च चोंच छ सागर मा
गढ़वाल भूमिम जन्म लिने स्यु कथा लिखणू गढ़वाळि हि मा ||"
--- बचन सिंह नेगी
श्रीरामचरित मानस (गढ़वाली भाषा ) बटि
वूंन श्रीरामचरित मानस,महाभारत ग्रन्थसार, बाल्मीकि रामायण भाग-1 व भाग-2,श्रीमद्भगवतगीता, ब्रह्म -सूत्र(वेदान्त दर्शन) जना बड़ा-बड़ा धार्मिक ग्रन्थों को अनुवाद करी | यो गढ़वाळि अनुवाद, गढ़वाली भाषा-साहित्य का वास्ता अनमोल धरोहर छन | वाकै मा इना कालजयी महाकाव्यों को गढ़वाळि मा अनुवाद कन्नौ वास्ता साधना चयेंद , तपस्या चयेंद,भौत ज्यादा टैम चैंद | वूं कि 12 हौरि पुस्तक प्रकाशित छन अर कुल मिलैकि वूंकि 17 (सत्रह) पुस्तक प्रकाशित छन |
श्रद्धेय बचन सिंह नेगी जी को जलम 04 नवम्बर 1932 मा जिला- टिहरी , सारज्यूला पट्टी का बागी गौं (भागीरथी पुरम का नजीक) मा ह्वे छौ अर वूं को स्वर्गवास 21मार्च 2020 खुणी देहरादून मा ह्वे ग्ये | वूंका छ्वट्टा छौंद यानि बाळपन मा हि बचन सिंह नेगी जी का पिताजि को स्वर्गवास ह्वे ग्ये छौ | सन् 1950 मा प्रताप इण्टर कॉलेज (टिहरी) बटि वूंन इण्टर करि छौ | सन् 1952 मा डी.ए.वी. कॉलेज देहरादून बटि बी.ए.करि अर साहित्य रत्न ,प्रयाग यानि इलाहाबाद बटि करी | सरकारी नौकरी परैं वु सन् 1954 मा कृषि विभाग मा श्रद्धेय बचन सिंह नेगी जी कि नियुक्ति ह्ले छै अर वु सन् 1990 मा जिला परिषद का अपर मुख्य अधिकारी पद बटि रिटैर ह्वेनि |
गढ़वाळि भाषा-साहित्य तैं समर्पित "आखर" समिति(श्रीनगर गढ़वाल) का वास्ता य गौरव कि बात रै कि- डॉ.गोविन्द चातक जी कि जयन्ती परैं (19 दिसम्बर 2019)गढ़वाळि साहित्य मा अपणो अमूल्य योगदान द्येणा वास्ता स्व. बचन सिंह नेगी जी तैं श्री मोहन लाल नेगी जी दगड़ा *डॉ.गोविन्द चातक स्मृति आखर साहित्य सम्मान- 2019* से सम्मानित करी छौ | वूंकि तबियत खराब होणा वजौ से 19 दिसम्बर 2019 खुणी देहरादून का हिन्दी भवन मा आखर समिति द्वारा वीर्येयां ये कार्यक्रम मा श्रद्धेय बचन सिंह नेगी जी कि सुपुत्री निर्मला विष्ट जीन वूं को सम्मान ल्ये छौ | इन विभूतियों तैं सम्मानित कैरिक क्वी बि संस्था या समिति अफुतैं गौरवान्वित मैसूस कर्द अर इलैई एक तरौं से "आखर" समिति बि इन विभूति तैं सम्मानित कैरिक अपणा आप सम्मानित ह्वे |
वूं तैं जो सम्मान मिला छा ,वो -
(1)सन् 2001 मा उत्तराखण्ड क्षत्रिय कल्याण समिति बटि सम्मानित |
(2) सन् 2016 मा "महानायक भक्त दर्शन सम्मान" (काफल पाको फाउंडेशन) |
(3) सन् 2007 मा राष्ट्रीय हिंदी परिषद ,मेरठ द्वारा " हिन्दी गौरव सम्मान "
(4) सन् 2019 मा "डॉ.गोविन्द चातक स्मृति आखर साहित्य सम्मान -2019 "(आखर समिति,श्रीनगर गढ़वाल) |
वूं कि साहित्य साधना अर काम द्यखण से यो मैसूस होन्द कि - जै सम्मान अर पच्छ्याण का श्रद्धेय बचन सिंह नेगी जी हकदार छायि वो वूं तैं अपणा राज्य अर गढ़वाळि भाषा- साहित्य विरादरी मा नि मिली | अर ! य बि आश्चर्य कि बात छ पैलि बटि ज्वा जगा (देहरादूण) साहित्यिक गतिविधियूं काे केन्द्र रायि वखि इना महान साहित्य साधक गुमनाम रैनि |
"आखर " समितिन् श्री बचन सिंह नेगी जी का भग्यान( दिवंगत )होण परैं वूं तैं सादर श्रद्धांजलि द्ये अर वीं घड़ी मा वूं का शोक -संतप्त परिवार का प्रति संवेदना व्यक्त करी | सब्या जगौं मा लॉकडाउन (कोरोना वाइरस द्वारा फैलण वळि महामारी का वजौ से) होण से फोन कांफ्रेंस का जरिया इक श्रद्धाजंली सभा को आयोजन बि पत्रकार/लेखक शीशपाल गुसाईं (देहरादून) द्वारा कर्ये ग्ये | डॉ.अरुण कुकसाल (श्रीकोट/श्रीनगर ) ,साहित्यकार श्री महावीर रवांल्टा( अराकोट), पत्रकार महिपाल सिंह नेगी (टिहरी ) ,वरिष्ठ साहित्यकार श्री नरेन्द्र कठैत (पौड़ी ) , युगवाणी के संजय कोठियाल , मैती आन्दोलन के पद्म श्री कल्याण सिंह रावत , संदीप रावत( आखर ,श्रीनगर) , श्री शूरवीर रावत (देहरादून ) , डॉ.सत्यानन्द बडोनी , श्री जय सिंह रावत , श्री चन्दन सिंह नेगी ,श्री चन्द्रदत्त सुयाल द्वारा ईं फोन कांफ्रेंस का माध्यम से स्व.बचन सिंह नेगी जी तैं श्रद्धांजलि द्यिये ग्ये |
प्रकाशित पुस्तक--
पुस्तक. - प्रकाशन वर्ष
1. रामचरित मानस (गढ़वाली अनुवाद)-- 2001
2. बाल्मीकि रामैण (गढ़वाली भाषा )-- - 2008
3. श्रीमद् भगवत गीता (गढ़वाली भाषा अनुवाद)-2002
4. ब्रह्म- सूत्र (गढ़वाली भाषा)-- 2009
5. महाभारत ग्रन्थसार (गढ़वाली भाषा)- --2007
6. गढ़वाली कविताएं ----2009
7.गढ़गौरव महाराणी कर्णावती (गढ़वाली काव्य)- 2010
8. प्रभा खंडकाव्य (हिंदी)--2001
9. गंगा का मायका (केदारखण्ड गढ़वाल- हिंदी गद्य ) --2002
10. डूबता शहर टिहरी (उपन्यास)--2004
11.आशा किरण (हिंदी काव्य) --- 2005
12. वेद संहिताएं (सामान्य परिचय) ---2010
13. मेरी कहानी --- 2009
14. गढ़वाल के इतिहास पर कुछ लेख --2010
15. देवभूमि उत्तराखण्ड -- 2014
16. भाव वीथिका (काव्य संग्रह ) --2005
17. गद्य मंजूषा (गद्य रचनाएं ) --2009
कुछ -कुछ साहित्य अब्बि बि अप्रकाशित छ |
महान साहित्य साधक स्व. बचन सिंह नेगी जी तैं शत-शत नमन अर विनम्र श्रद्धांजलि |
© संदीप रावत
(न्यू डांग,श्रीनगर गढ़वाल )
Wednesday, March 25, 2020
संदीप रावत ,न्यू डांग,श्रीनगर गढ़वाल 26/03/2020
आप सब्यूं तैं सादर प्रणाम | आजकल ज्वा "कोरोना " कि मार सैर्या दुन्या मा होणी छ ,वां से अफुतैं बि बचौण अर हौर्यूं तैं बि बचौण , बस! फिलहाल अपणा-अपणा घौर मा रौण | भयों ! सैन-सफै कु ध्यान रखण अर दगड़ा-दगड़ि सरकार द्वारा आजकल जो निर्देश दिये जाणा छन वूं तैं मनण हम सब्यूं कि जिन्दगी का वास्ता भौत जरूरी छ | माँ भगवती कि कृपा अर हम सब्यूं कि सावधानी से सब ठिक ह्वे जालु | ये टैम परैं --
" दगड्या "
दिदा ! दुन्या मा
कु अपड़ो ?
अर कैको दगड़ो ?
बस, एक दगड़्या खास
अर वा छ तेरी आस
नि होण निरास !
© संदीप रावत , न्यू डांग ,श्रीनगर गढ़वाल |
Friday, November 8, 2019
कविता -*उत्तराखण्ड बणिगे* © संदीप रावत ,न्यू डांग ,श्रीनगर गढ़वाल |
*उत्तराखण्ड बणिगे*
'हम कोदू - झंग्वारू खौंला
पर उत्तराखण्ड बणौला '
ये नारा का दगड़ी
लोगुन सड़क्यूं परैं लड़ी लड़ै
भूख -तीस सै ,
अपणा हडग्यूं तुड़वै
कैsन अपणी ज्यान द्ये
तब जै कि उत्तराखण्ड पै |
पर !
तब क्या ह्वे ?
हमारा सुपिन्या
कुर्च्येणा छन ,
जल- जंगल-जमीन का पुस्तैनी हक
हमुसे लुच्छ्येणा छन |
"एक लपाग " बटि © संदीप रावत ,न्यू डांग ,श्रीनगर गढ़वाल |
Thursday, October 24, 2019
आलेख - *बी. मोहन नेगी विविध आयामी व्यक्तित्व के धनी एवं उत्तराखण्ड की अनमोल धरोहर थे * ©संदीप रावत ,न्यू डांग ,श्रीनगर गढ़वाल
प्रसिद्ध चित्रकार स्व.बी. मोहन नेगी जी की द्वितीय पुण्य तिथि ( 25 अक्टूबर ) पर विनम्र श्रद्धांजलि --
*बी.मोहन जी विविध आयामी व्यक्तित्व के धनी एंव उत्तराखण्ड की अनमोल धरोहर थे | *
© संदीप रावत ,न्यूं डांग ,श्रीनगर गढ़वाल |
गढ़वाल की इस उर्वरा भूमि में देश की कई असाधारण प्रतिभाओं ने जन्म लिया ,जिन्होंने अपूर्व ख्याति अर्जित की | बहुआयामी व्यक्तित्व के धनी प्रसिद्ध चित्रकार उत्तराखण्ड की ऐसी धरोहरों में से एक थे जिन्होंने निरन्तर अपने प्रयासों से, रंग-लेखनी ,कोलाजों के माध्यम से ,चित्रकारी के माध्यम से ,कविता पोस्टरों के माध्यम से अपनी एक अलग पहचान बनाई और उत्तराखण्ड की संस्कृति,भाषा-साहित्य को विभिन्न कोलाजों ,चित्रकारी/ रेखांकनों के माध्यम से उजागर करने एंव प्रचार-प्रसार करने में सदैव अग्रणीय भूमिका निभाई |
बी.मोहन जी के व्यक्तित्व या उनकी बहुआयामी रचना शीलता पर लिखना बहुत कठिन है , कि उनकी रचना धर्मिता के किस पहलू पर विस्तार पूर्वक लिखा जाए - "उनके द्वारा बनाए गए कविता पोस्टरों के बारे में लिखा जाए या बनाए गए व्यंग्य चित्रों पर , उत्तराखण्ड की ज्वलन्त समस्याओं यथा पलायन, यहां की विलुप्त होती संस्कृति को समय-समय पर अपनी चित्रकारी व कोलाजों के माध्यम से उजागर करने पर लिखा जाए या फिर यहां की लोक संस्कृति के प्रचार-प्रसार पर , उनके द्वारा बनाए गए रेखाचित्रों पर लिखा जाए या फिर उनके द्वारा बनाए गए अनगिनत साहित्यकारों की पुस्तकों के मुखपृष्ठों अर्थात पुस्तक आवरणों पर , उनके पेपरमैसी के काम पर लिखा जाए या फिर बनाए गए मुखौटों पर , उनके साहित्य प्रेम पर लिखा जाए या फिर उनके कवित्व पहलू पर , उनके द्वारा संकलित/संग्रहित किए गए बहुत पहले बंद पड़े पत्र-पत्रिकाओं के शुरुआती अंको ,दुर्लभ रचनाओं और दुर्लभ पुस्तकों पर या फिर दुर्लभ पुस्तकों व रचनाओं को अपनी चित्रकारी या कला से नया कलेवर देने पर , या फिर उनके गढ़वाली भाषा- साहित्य के संरक्षण एंव प्रचार-प्रसार में योगदान देने पर लिखा जाए | " उनके बारे में एक पूरी पुस्तक भी लिखी जाए तो शायद कम पड़ेगी |
बी.मोहन जी की जिस बिधा या प्रतिभा से सभी सबसे ज्यादा परिचित थे वो है कवियों की कविताओं पर उनके द्वारा बनाए गए "कविता पोस्टर " | उत्तराखण्ड में इस विधा को बी.मोहन नेगी ने एक ऊंचाई प्रदान की | उन्होंने गढ़वाली, कुमांउनी,जौनसारी ,रवांल्टी ,नेपाली के अलावा देश- दुनिया के अन्य कवियों की कविताओं पर कविता पोस्टर बनाए | उन्होंने देश-दुनिया के न जाने कितने कवियों की कविताओं को अपनी रंग-लेखनी के माध्यम से यानि चित्रकारी के माध्यम से एक बड़ा फलक दिया | यह मेरा भी सौभाग्य है कि बी.मोहन जी ने मेरी भी पांच- छह छोटी कविताओं पर कविता पोस्टर बनाकर मुझे कृतार्थ किया | उन्होंने मेरी कविताओं पर बनाए गए कविता पोस्टरों को पत्र-पत्रिकाओं में छपने हेतु स्वंय भेज दिया था और साथ ही मुझे भी डाक से बनाए गए कविता पोस्टर भेज दिए थे , ऐसी थी बी.मोहन जी की सरलता, सहजता |
श्री नरेन्द्र कठैत जी द्वारा कई हिन्दी कवियों की कविताओं के लगभग 500 गढ़वाली अनुवाद किए गए हैं और इन गढ़वाली अनुवादों में से बी0 मोहन जी ने लगभग 200 अनुवादों पर रेखांकन किया यानि कविता पोस्टर बनाए | यह जुगलबंदी बहुत चर्चित रही है | नरेन्द्र कठैत जी द्वारा हिमवंत कवि चन्द्र कुंवर बर्त्वाल जी की गढ़वाली अनुवादित लगभग 70 -72 कविताओं पर बी.मोहन जी ने कविता पोस्टर पोस्टर बनाए और इन सहित चन्द्र कुंवर बर्त्वाल की रचनाओं पर उन्होंने लगभग 100 कविता पोस्टर बनाए |
उत्तराखण्ड की भाषाओं के कविता पोस्टरों की जगह- जगह प्रदर्शनी लगाकर इसके माध्यम से उन्होंने यहां भाषा आन्दोलन में भी सक्रिय व अग्रणीय भूमिका निभाई | उनके बनाए गए कविता पोस्टरों से गढ़वाली-कुमांउनी भाषाओं का खूब प्रचार-प्रसार हुआ ,क्योंकि कविता पोस्टरों को देखकर लोग कवि की पूरी कविता जरूर पढ़ते | अब कई लोगों ने उन से प्रेरित होकर चित्र कला और कविता पोस्टर को अपनी कलात्मक अभिव्यक्ति का माध्यम बनाया है , जिनमें अतुल गुसांईं "जाखी " , दीपक नेगी , आशीष नेगी आदि प्रमुख हैं |
बी.मोहन जी ने लगभग सौ पुस्तकों व पत्रिकाओं के मुख पृष्ठ यानि पुस्तक आवरण/कवर पेज बनाए हैं | मेरी चारों प्रकाशित गढ़वाली पुस्तकों के मुख पृष्ठ उन्हीं के द्वारा बनाए गए हैं | मेरे निजी संकलन में लगभग 35 पुस्तकें ऐसी हैं जिनके मुख पृष्ठ बी.मोहन जी द्वारा बनाए गए हैं | उनके द्वारा सबसे पहला मुख पृष्ठ गढ़ गौरव श्रद्धेय नरेन्द्र सिंह नेगी जी की पुस्तक "खुचकण्डी " के लिए बनाया गया था | प्रसिद्ध साहित्यकार श्री नरेन्द्र कठैत जी की प्रकाशित सभी 14 पुस्तकों के मुखपृष्ठ बी.मोहन जी द्वारा ही बनाए गए हैं |
मेरा बी.मोहन जी से आमने-सामने परिचय सन् 2008 में श्री विमल नेगी जी के सम्पादकत्व में प्रकाशित होने वाले गढ़वाली पाक्षिक " उत्तराखण्ड खबरसार" के पौड़ी अवस्थित कार्यालय में हुआ था | बाद में पौड़ी ,श्रीनगर रोड़ के नीचे उनके निवास पर भी कई बार जाने का मौका मिला | उनके निवास पर जाने पर उनकी कलाकृति या रचना धर्मिता व साहित्य प्रेम उनके निवास के प्रवेश द्वार पर ही दिख जाता है | उनके हाथों से बहुत सुन्दर ढंग से लिखी हुईं तारादत्त गैरोला द्वारा रचित "सदेई " की ये पंक्तियां - " हे ऊंची डांड्यो तुम निसी ह्वावा " गेट के सामने याने प्रवेश द्वार के अन्दर की दाईं तरफ वाली दीवार पर लिखी हुईं हैं |
गढ़वाली भाषा-साहित्य की दुर्लभ और पुरानी पुस्तकों व रचनाओं ,बहुत पहले बंद हो चुके अखबारों के पहले अंको का उन्होंने संग्रह किया ,उन्हें सहेज कर रखा | साथ ही अपनी चित्रकारी व रेखांकन से कई दुर्लभ रचनाओं को नया कलेवर देकर प्रचार-प्रसार करने के साथ ही कई दुर्लभ रचनाअों को लुप्त होने से बचाया |
सन् 2013 में गढ़वाली गद्य की पुस्तक "गढ़वाली भाषा अर साहित्य कि विकास जात्रा " ( सन 2014 में प्रकाशित) लेखन के दौरान जब कुछ महत्वपूर्ण जानकारियां जुटाने मैं उनके आवास पर गया तो उन्होंने मुझे भीमराज सिंह कठैत द्वारा लिखित गढ़वाली उपन्यास "शेरू " की फोटो स्टेट व बाइंड की हुई प्रति भेंट की | इस उपन्यास की प्रतियां उन्होंने स्वयं फोटो स्टेट की थीं एवं स्वयं बाइंड करके कई साहित्यकाराें को मुफ्त में भेंट की थी | गढ़वाली साहित्य की पहली गढ़वाली कथा "गढ़वाळि ठाठ " ( सदानन्द कुकरेती जी द्वारा लिखित) जोकि सन् 1913 में "विशाल कीर्ति" मासिक पत्र में प्रकाशित हुई थी, उस कथा का आधा भाग मैंने बी0मोहन जी के घर में उनके नये-पुराने गढ़वाली साहित्य के संकलन में शामिल "विशाल कीर्ति " के "अगस्त-सितम्बर-अक्टूबर, सन् 1913" के अंक में स्वयं देखा व पढ़ा | उसका उद्धरण /संदर्भ मैंने अपनी पुस्तक में भी दिया है | ऐसे ही अनगिनत दुर्लभ पत्र-पत्रिकाओं एवं पुस्तकों का उन्होंने रख रखाव किया था |
बी.मोहन जी के संकलन में मैंने गढ़वाली भाषा में छपे हुए पॉम्पलेट/पर्चे, पोस्टर ,शादी के कार्ड ,निमंत्रण पत्र देखे जिनमें से कछ-कुछ का जिक्र भी मैंने अपनी पुस्तक (गढ़वाळि भाषा अर साहित्य कि विकास जात्रा ,सन् 2014 में प्रकाशित)में किया हुआ है | गढ़वाली भाषा-साहित्य में व्यंग्य चित्रों की शुरुवात भी बी.मोहन जी ने ही की थी |
उनकी सहजता व सरलता ऐसी थी कि वे सभी के साथ एक जैसा व्यवहार रखते थे - चाहे कोई वरिष्ठ साहित्यकार हो या नया लेखक /कवि | अपने मजाकिया अंदाज में बी0 मोहन जी नए कवि एवं लेखकों को गम्भीर सीख दे जाते थे | जून 2015 में जब वे श्रीनगर रेनबो पब्लिक स्कूल के पास एक कोचिंग सैंटर में बच्चों को "पेपरमेसी " सम्बन्धी जानकारी देने आए थे तो उन्होंने वहां पर मुझे भी फोन करके बुला लिया | साथ ही पौड़ी में गढ़वाली कथाकार श्री महेशानन्द जी के एक कथा संग्रह "डडवार" के लोकार्पण अवसर पर बी0मोहन जी के साथ मंच पर बैठने का सौभाग्य प्राप्त हुआ था | वे क्षण भी मेरे लिए अदभुद थे | वास्तव में बी0मोहन जी एक निष्काम कर्मयोगी , असाधारण प्रतिभा के धनी परन्तु सहज-सरल व संवेदनशील व्यक्ति थे |
उनके अवसान से गढ़वाली भाषा -साहित्य जगत एंव रंग-लेखन /चित्रकला जगत में जो खालीपन आया है उसे भरना फिलहाल बहुत मुश्किल है | सुकृत्यों के लिए जिनका नाम , यश और कीर्ति होती है ,वे सदैव जीवित रहते हैं | उनके द्वारा बनाए गए कविता -पोस्टरों , पुस्तकों के बनाए गए मुख पृष्ठों, कोलाजों , रेखांकनों के रूप में बी.मोहन जी सदैव जीवित रहेंगे | गढ़वाली भाषा- साहित्य की विकास यात्रा में उनके अतुलनीय एवं अमूल्य योगदान को सदैव याद किया जाएगा |इस महान विभूति को विनम्र श्रद्धांजलि एंव श्रद्धा सुमन अर्पित!
(नोट - यह आलेख वरिष्ठ गढ़वाली साहित्यकार श्री नरेन्द्र कठैत द्वारा बी.मोहन नेगी जी पर सम्पादित स्मृति ग्रंथ * सृजन विशेष एवं स्मृति शेष* मे प्रकाशित है | )
© संदीप रावत ,न्यू डांग ,श्रीनगर गढ़वाल |